Gleðilegi geðrofsleikurinn
Menntaskólinn í Reykjavík · sun 3. nóv kl. 18:00
Gleðilegi geðrofsleikurinn
– ópera eftir Guðmund Stein Gunnarsson
Sýningar á Óperudögum 2024
Miðasala
Fólk fer langar leiðir út í heim til að verða fyrir alls konar læknandi en jafnframt spennandi upplifunum í gegnum hugbreytandi efni með þartilgerðum leiðsögumönnum. En hvað með að koma bara í geðrof? Væri það ekki gaman?
Áheyrendum býðst að koma á Gleðilega geðrofsleikinn og uppgötva undur og stórmerki geðrofsins og kanna lendur hugans til hins ýtrasta. Í óperunni upplifum við hluti sem byggðir eru á lýsingum fólks sem hefur farið í geðrof og heyrum jafnvel brot úr lagstúfum sem „komu til einhvers“ sem var í geðrofi.
Sagan segir frá Huga, sem einn góðan veðurdag, eða kvöld, eða nótt sér allt mjög skýrt, en það sem hann sér er kannski ekki í raunveruleikanum. Eða hvað?
Gleðilegi geðrofsleikurinn var frumsýndur á Myrkum músíkdögum í janúar 2024 og komust færri að en vildu. Vegna fjölda áskorana hefur hins vegar verið ákveðið að endurtaka leikinn og spurningin er: "Ert þú með í leiknum?"
„Það er vart á neinn hallað þó að ópera Guðmundar Steins Gunnarssonar – Gleðilegi geðrofsleikurinn – sé tekin út fyrir sviga sem áhugaverðasta nýsmíðin á hátíðinni að þessu sinni. Verkið sem byrjaði eins og nítjándu aldar óperetta umpólaðist fljótt í mjög ágenga hugleiðingu um geðrof og viðbrögð samfélagsins við því óáþreifanlega fráviki sem leikur oft grátt þá sem eiga við það að etja. Það var þó í þessu einhver von sem kristallaðist í lokaatriðinu þegar rofaði til . . . . Það hefur sjaldan átt betur við að lýsa tónlistarviðburði með orðunum „þetta var geðveikt !““
-Pétur Grétarsson um flutning Gleðilega geðrofsleiksins á Myrkum músíkdögum
Um Einvaldsóð, fyrstu óperu Guðmundar Steins frá árinu 2017 hafði prófessor Atli Ingólfsson meðal annars þetta að segja: „Hér var flutt ópera af wagnerískri lengd, vídd og dýpt. Þetta voru tíðindi og þau verða ekki oft stærri í íslenska óperulífinu.“ Óperan var jafnframt valin eitt af 5 verkum áratugarins 2010-2020 af tímaritinu Aesthetics for Birds. Nú sjö árum síðar snýr Guðmundur Steinn aftur með splunkunýja óperu sem ætti að láta engann ósnortinn og fjallar um málefni líðandi stundar á gamansaman en jafnframt átakalegann hátt.
AÐVÖRUN: Athugið að atriði í sýningunni eru ekki við hæfi barna og gætu reynst mörgum óþægileg.
Verkefnið er styrkt af Sviðslistasjóði, Tónlistarsjóði og Reykjavíkurborg og sérstakar þakkir fær Menntaskólinn í Reykjavík fyrir að hýsa sýninguna.
Sýningin fer fram á 2. hæð Gamla skólans, því miður er sú hæð ekki aðgengileg hjólastólum með lyftu.
AÐVÖRUN: Athugið að atriði í sýningunni eru ekki við hæfi barna og gætu reynst sumum óþægileg.
