Heiðdís Hanna Sigurðardóttir, sópran, útskrifaðist vorið 2018 úr NAIP meistaranámi frá Listaháskóla Íslands og starfar nú sem sjálfstætt starfandi söngkona. 
Hún hóf söngnám hjá Guðrúnu Jóhönnu Jónsdóttur í Tónlistarskóla Garðabæjar og að framhaldsprófi loknu hélt hún til Þýskalands og stundaði söngnám á bakkalárstigi við Tónlistarháskólann í Freiburg hjá Prof. Angela Nick í þrjú ár. Hún skipti svo yfir í Listaháskóla Íslands og lauk síðasta árinu í bakkalárnáminu hjá Þóru Einarsdóttur, Ólöfu Kolbrúnu Harðardóttur og Kristni Sigmundssyni.
Heiðdís Hanna sigraði í keppninni Ungir einleikarar og kom fram sem einsöngvari með Sinfóníuhljómsveit Íslands á tónleikunum Ungir einleikarar í janúar 2016. Sama ár þreytti hún frumraun sína á óperusviðinu í hlutverki Zerlinu í uppfærslu Íslensku óperunnar á Don Giovanni eftir Mozart. Á árunum 2015-2017 kom hún reglulega fram á tónleikum í tónleikaröðinni Perlur íslenskra sönglaga í Hörpu. Heiðdís Hanna hefur einnig starfað með hljómsveitinni HATARI og komið fram sem einsöngvari með þeim á tónleikum á Húrra, í Gamla Bíói og á Hlustendaverðlaununum 2018. Sumarið 2018 söng hún hlutverk 1. Dömu í uppfærslu Escales Lyriques á Töfraflautunni eftir Mozart á frönsku eyjunni Ile d‘Yeu.
Frá útskrift hefur Heiðdís Hanna komið reglulega fram sem einsöngvari á tónleikum, m.a. í tónleikaröðinni Á ljúfum nótum í Fríkirkjunni í Reykjavík, sunnudagstónleikaröð í Hannesarholti, Kúnstpásu í Íslensku óperunni og Sumartónleikum í Skálholti. Hún fór með hlutverk í kammeróperunni Kornið eftir Birgit Djupedal og Ingunni Láru Kristjánsdóttur sem var frumflutt á Óperudögum í Reykjavík haustið 2018. Einnig fór hún með hlutverk Sónötu í nýrri uppsetningu á samnefndri barnaóperu eftir Hjálmar H. Ragnarsson og Messíönu Tómasdóttur sem sýnd var á sömu hátíð. Heiðdís Hanna hefur sungið með kór Íslensku óperunnar frá hausti 2016 og syngur nú í sýningunni Brúðkaup Fígarós í Þjóðleikhúsinu. Hún hefur einnig starfað með kammerkórnum Schola cantorum Reykjavicensis og sungið með honum m.a. á tónleikunum Íslendingasögur – Sinfónísk sagnaskemmtun í tilefni af 100 ára afmæli fullveldis í samstarfi við Sinfóníuhljómsveit Íslands og á Kirkjulistahátíð 2019.   

p.p1 {margin: 0.0px 0.0px 8.0px 0.0px; font: 11.0px 'Trebuchet MS'; color: #000000} span.s1 {font-kerning: none}