Hrafnhildur Árnadóttir Hafstað er sópransöngkona og kórstýra Vox feminae en hún tók við stjórn kórsins árið 2019 úr höndum stofnanda kórsins Margrétar J. Pálmadóttur.

Hrafnhildur lærði óperusöng í Amsterdam og útskrifaðist frá Hollensku óperuakademíunni árið 2015 með Valerie Guillorit og Margreet Honig sem aðalkennara. Áður lauk hún burtfararprófi frá Söngskólanum í Reykjavík undir handleiðslu Dóru Reyndal.

Í Hollandi starfaði Hrafnhildur eftir útskrift og kom víða fram á tónleikum og í óperusýningum. Hún kom m.a. fram hjá Hollensku þjóðaróperunni í Amsterdam, Nationale Reisopera, á tónleikaferðalagi um allt land með DommelGraaf theater, á tónlistarhátíðum eins og Grachtenfestival, Uitmarkt og á viðburðum m.a. í Concertgebouw, Stedelijk museum og Vondelpark. 

Hrafnhildur kemur reglulega fram sem einsöngvari á Íslandi og meðal verkefna hennar undanfarin ár eru La Traviata hjá Íslensku óperunni, Jólatónleikar og Vínartónleikar hjá Sinfóníuhljómsveit Íslands, einsöngur á vortónleikum Karlakórs Reykjavíkur, tónleikar á hátíðunum Sönghátíð í Hafnarborg, Listahátíð í Reykjavík, Músík í Mývatnssveit, Reykholtshátíð og Óperudögum. Einnig hefur hún komið fram á sumartónleikaröð í Listasafni Sigurjóns Ólafssonar, hjá Kammermúsíkklúbbnum, og sem einsöngvari við ýmis önnur tækifæri.